Sari nagusia

Kazetari berria

• Saritutakoa Ikusi

Aitormen berezia

Saridunak: Bernardo Atxaga.

Zenbait arlotan abiadura handian indartu da euskara azken hamarraldiotan. Garabide bikaina izan duen eremuetako bat literaturarena da, ezbairik gabe.

Bada aldizkari bat, espezializatua, literaturaren lekuko dena eta, aldi berean, euskal literaturgintza bera eta literaturgileak ere aberasten dituena. Aldizkari espezializatu hori da aurtengo Rikardo Arregi Kazetaritza Sarian Aitormen Berezia hartuko duena: ERLEA aldizkaria.

Gaztea da –bi urte eta lau zenbaki baino ez ditu-, baina jadanik betirako erreferentzia bihurtu zaigu. Literaturaren gainean sekula izan dugun aldizkaririk aberats eta dotoreena da. Literaturzale guztientzako gozagarriz beteriko opari oparoa. Idazleek beren idazlanetan azaltzen ez dituzten jakingarri ugari ezagutzeko balio du, eta euskal literaturako ahots asko biltzen jakin du. Genero eta idazle askotarikoak bikain lotzen ditu euskal literaturaren uztarrian, eta bertakokeriarik gabe. Euskal literaturak behar zuen, erdietsi duen maila altua kontuan harturik, maila goreneko aldizkari bat, nazioarteko onenen parekoa, alde grafikoa ere bikain zaintzen duena. Bertako eta inguruko literaturgintzarako ez ezik, munduko edozein herrialdetako literaturetarako eredugarri  dena. Hori da, bistan da, Erlea aldizkaria, Bernardo Atxagak zuzentzen eta Euskaltzaindiak argitaratzen duena. 

Aitormen Berezia, beraz, Erlea aldizkariarentzako.

Epaimahaiaren Sari Berezia

• Saritutakoa deskargatu

• Gaur eguneko kazetaritza, oro har, berehalakotasunaren menpe dago ia erabat; jarduera horretan ere preziatua bezain eskasa da denbora. Garaiotan oso urria da egunerokotasunetik haratago doan ikerketa-kazetaritza, nahiz eta kazetaritzaren funtzio soziala eraginkortasunez betetzeko behar-beharrezkoa izan ildo hori. Merezimendu osoz kokatzen da kazetaritza mota horretan saritutako lana.
• Luzea da, baina irakurtzeko arina, behin hasiz gero bukatu gabe utzi ezin den horietakoa. Denboran aski hurbilekoa den gai bat -gai zail eta garratza- du aztergai erreportajeak. Egileak, halere, jakin du distantzia hartzen.
• Kazetaritza beste diziplina batzuekin uztartzen jakin du egileak, zehazki eta batez ere historiarekin, erreportajearen zorroztasunaren mesedean.
• Iturri asko landu ondorengo lana da, lekukotasun ugari eta erabakiorrak jasotzen dituena; oso ongi dokumentatua, beraz.
  
  
  
  

Ohorezko aipamena

Saridunak: Miren Jone Azurza eta Ignazio Arregi.
Saritutako lana: Euskarazko kazetaritza modernoaren zutoinen eraikuntzaren aitzindari izan dira Azurza eta Arregi, prentsa idatzian eta irratigintzan zehatz esanda.

Erraz eta berehala hartu du epaimahaiak aurtengo Ohorezko Aipamenari buruzko erabakia. Izan ere, saritutakoei, beren traiektoriaren argitan, ezbairik gabe zor baitzaie euskarazko komunikazioan jarduteak irabazirik batere ez eta buruhauste galantak eragiten zituen garaietan erein zuten haziagatik eta garatu zuten aitzindaritzagatik gu guztion aitormena.

Miren  Jone Azurza eta Ignazio Arregi dira XXIII Rikardo Arregi Kazetaritza Sariko Ohorezko Aipamena jasoko dutenak.

Arrazoi asko metatu ditu Epaimahaiak Ignazio Arregi eta Miren Jone Azurza Ohorezko Aipamenaren jabe egitearen alde, eta horiek guztiak esaldi honek laburbiltzen ditu: euskarazko kazetaritza modernoaren zutoinen eraikuntzaren aitzindari izan dira Azurza eta Arregi, prentsa idatzian eta irratigintzan zehatz esanda.

60 eta 70eko hamarraldietan jarri ziren euskarazko kazetaritza modernoaren zutoin nagusiak. Garai hartan, euskarazko kazetaritzak, baserri-girotik hiri- girorako pausoa eman zuen, baserri-giroa alboratu gabe. Ibilbide hori egiteari batez ere Zeruko Argiaren eskutik ekin zitzaion. 
Zeruko Argia arnasberrituaren orrialdeetan han ziren gerora euskal kulturan bide oparoa egin duten asko eta asko, tartean Rikardo Arregi bera. Guztien buru, sustatzaile eta aitzindari, Miren Jone Azurza. Miren Joneren ekina eta buruargitasuna ezinbesteko akuilu izan ziren euskal kazetaritzan garai hartan egin ziren aldaketak eragiterakoan, besteak beste informazio-kazetaritzari ateak irekitzerakoan. 1969tik 1975era bitartean izan zen Miren Jone Azurza Zeruko Argiaren zuzendari. Hona, Miren Jone zuzendari zela, 1970ean, Zeruko Argiaren 400. zenbakian, zenbaki berezian, euskarazko aldizkarietan aldizkari zenak bere buruaz zioena, hain zuzen ere irekitasunaren eta bide berrien urratzaile eta modernitatearen bilatzaile izaeraren erakusle diren hitzok: “euskaldun desberdinentzat egiten da: sinestun eta sinesgabe, ezkertiar eta eskuindar, aurrerakoi eta atzerakoi, baserritar eta kaletar, jakitun eta ezjakin, zahar eta gazte, hemengo eta mugaz handiko (...) Zeruko Argiak oso irekia, talde jakin bati lotu gabea eta lotan daudenen esnalea izan nahi du. Euskal iritzi eta jokabideetan dabiltzan guztientzat irekia. Idazle eta irakurle, denon artean egingo dugu Zeruko Argia bizi, gaurko, ireki. Esnatzaile eta euskalduna”.  

Ignazio Arregiren ekarpena eta aitzindaritza irratigintzari lotua da. Aipatutako garaian prentsa idatziarekin batera irratia zen euskal kazetaritzaren kabi eta emisore. Orduko euskal irratia esateak Loiolako Herri Irratia hizki handiz eta lodiz idaztea eskatzen du nahitaez. Bost mila herritarrek hilero hilero Loiolako Herri Irratiari harpidedun-kuota ordaintzen zioten. Era guztietako kazetaritza egiten zuten euskaraz, denbora pasarako tarteak bezala informazio saioak ere.  Ignazio Arregi 1965ean hasi zen esatari lanetan Loiolako Herri Irratian, eta bertan jardun zuen 1982 arte. Azken lau urteetan gainera, 1978tik 1982rarte alegia, zuzendari izan zen. Euskarazko irratigintzaren zuzia bizirik mantentzeko hil edo bizikoak izan ziren urte haietan egindako lan eskerga ez ezik, nabarmendu beharrekoa da, gainera, Ignazio Arregik geroago egindako lana ere. 1982ko abendutik 1985 bitartean “Eusko Irratia, Radiodifusión Vasca” Sozietate Anonimo Publikoaren administratzaile eta zuzendari izan zen. Haiek izan ziren euskararentzat berarentzat, euskal hiztunentzat eta euskarazko kazetaritzarentzat punta-puntako arnasgunea izan den eta den Euskadi Irratiaren oinarriak finkatu ziren urteak, euskarazko hizkera periodistiko baliagarria berariaz sortu duen Irratiaren zimenduak eraiki ziren urteak. Eta horretan Ignazio Arregi aitzindari. 

Euskarazko kazetaritza modernoaren zutoinen eraikitzaile eta bide berrien bilaketan aitzindari izan zaretelako, zuei bioi, beraz, Ignazio Arregi eta Miren Jone Azurzari, Rikardo Arregi Kazetaritza Sariaren XXIII. edizioko Ohorezko Aipamena.  

Ohorezko aipamena

Saridunak: Miren Jone Azurza eta Ignazio Arregi.
Saritutako lana: Euskarazko kazetaritza modernoaren zutoinen eraikuntzaren aitzindari izan dira Azurza eta Arregi, prentsa idatzian eta irratigintzan zehatz esanda.

Erraz eta berehala hartu du epaimahaiak aurtengo Ohorezko Aipamenari buruzko erabakia. Izan ere, saritutakoei, beren traiektoriaren argitan, ezbairik gabe zor baitzaie euskarazko komunikazioan jarduteak irabazirik batere ez eta buruhauste galantak eragiten zituen garaietan erein zuten haziagatik eta garatu zuten aitzindaritzagatik gu guztion aitormena.

Miren  Jone Azurza eta Ignazio Arregi dira XXIII Rikardo Arregi Kazetaritza Sariko Ohorezko Aipamena jasoko dutenak.

Arrazoi asko metatu ditu Epaimahaiak Ignazio Arregi eta Miren Jone Azurza Ohorezko Aipamenaren jabe egitearen alde, eta horiek guztiak esaldi honek laburbiltzen ditu: euskarazko kazetaritza modernoaren zutoinen eraikuntzaren aitzindari izan dira Azurza eta Arregi, prentsa idatzian eta irratigintzan zehatz esanda.

60 eta 70eko hamarraldietan jarri ziren euskarazko kazetaritza modernoaren zutoin nagusiak. Garai hartan, euskarazko kazetaritzak, baserri-girotik hiri- girorako pausoa eman zuen, baserri-giroa alboratu gabe. Ibilbide hori egiteari batez ere Zeruko Argiaren eskutik ekin zitzaion. 
Zeruko Argia arnasberrituaren orrialdeetan han ziren gerora euskal kulturan bide oparoa egin duten asko eta asko, tartean Rikardo Arregi bera. Guztien buru, sustatzaile eta aitzindari, Miren Jone Azurza. Miren Joneren ekina eta buruargitasuna ezinbesteko akuilu izan ziren euskal kazetaritzan garai hartan egin ziren aldaketak eragiterakoan, besteak beste informazio-kazetaritzari ateak irekitzerakoan. 1969tik 1975era bitartean izan zen Miren Jone Azurza Zeruko Argiaren zuzendari. Hona, Miren Jone zuzendari zela, 1970ean, Zeruko Argiaren 400. zenbakian, zenbaki berezian, euskarazko aldizkarietan aldizkari zenak bere buruaz zioena, hain zuzen ere irekitasunaren eta bide berrien urratzaile eta modernitatearen bilatzaile izaeraren erakusle diren hitzok: “euskaldun desberdinentzat egiten da: sinestun eta sinesgabe, ezkertiar eta eskuindar, aurrerakoi eta atzerakoi, baserritar eta kaletar, jakitun eta ezjakin, zahar eta gazte, hemengo eta mugaz handiko (...) Zeruko Argiak oso irekia, talde jakin bati lotu gabea eta lotan daudenen esnalea izan nahi du. Euskal iritzi eta jokabideetan dabiltzan guztientzat irekia. Idazle eta irakurle, denon artean egingo dugu Zeruko Argia bizi, gaurko, ireki. Esnatzaile eta euskalduna”.  

Ignazio Arregiren ekarpena eta aitzindaritza irratigintzari lotua da. Aipatutako garaian prentsa idatziarekin batera irratia zen euskal kazetaritzaren kabi eta emisore. Orduko euskal irratia esateak Loiolako Herri Irratia hizki handiz eta lodiz idaztea eskatzen du nahitaez. Bost mila herritarrek hilero hilero Loiolako Herri Irratiari harpidedun-kuota ordaintzen zioten. Era guztietako kazetaritza egiten zuten euskaraz, denbora pasarako tarteak bezala informazio saioak ere.  Ignazio Arregi 1965ean hasi zen esatari lanetan Loiolako Herri Irratian, eta bertan jardun zuen 1982 arte. Azken lau urteetan gainera, 1978tik 1982rarte alegia, zuzendari izan zen. Euskarazko irratigintzaren zuzia bizirik mantentzeko hil edo bizikoak izan ziren urte haietan egindako lan eskerga ez ezik, nabarmendu beharrekoa da, gainera, Ignazio Arregik geroago egindako lana ere. 1982ko abendutik 1985 bitartean “Eusko Irratia, Radiodifusión Vasca” Sozietate Anonimo Publikoaren administratzaile eta zuzendari izan zen. Haiek izan ziren euskararentzat berarentzat, euskal hiztunentzat eta euskarazko kazetaritzarentzat punta-puntako arnasgunea izan den eta den Euskadi Irratiaren oinarriak finkatu ziren urteak, euskarazko hizkera periodistiko baliagarria berariaz sortu duen Irratiaren zimenduak eraiki ziren urteak. Eta horretan Ignazio Arregi aitzindari. 

Euskarazko kazetaritza modernoaren zutoinen eraikitzaile eta bide berrien bilaketan aitzindari izan zaretelako, zuei bioi, beraz, Ignazio Arregi eta Miren Jone Azurzari, Rikardo Arregi Kazetaritza Sariaren XXIII. edizioko Ohorezko Aipamena.