Sari nagusia

• Saritutakoa deskargatu

Sariduna: Karlos Zurutuza.
Saritutako lana: "Arabiar oldarraldiak Libia eta Iraken" gaiaren inguruan 2011ko ekainetik 2012ko apirila bitartean Berrian eta Argian argitaratutako erreportajeak.
Saria: 9.000 euro, diploma eta Xabier Laka eskultorearen oroi-ikurra.

Gerran bizi diren tokietako kontakizunak idazten egin zaigu espezialista aurtengo Sari nagusiaren irabazlea. Urteak daramatza.free lance gisa hara eta hona, injustiziak kontatzen, bazter urrunetako saminak azaleratzen, injustiziak eta saminak sentiarazten.
Kontuan hartzekoak dira, bestalde, free lance gisa lan egitearen arriskuak, besteak beste bikaintasunaren exijentzia areagotu egiten baitzaio horrela dabilenari: aurtengo saridunak bete-betean gainditzen du, oso nota altuarekin, bikaintasunaren marra. Karlos Zurutuza da sariduna, eta ondorengoak dira epaimahaikideek nabarmendu nahi dituzten merezimenduak:

• Kalitatezko kontakizunak eta kazetaritza da Karlos Zurutuzaren emaitza. Zuzeneko kontakizunak dira bereak, bera baita notiziaren, gertakariaren eta protagonistaren bila doana. Arabiar herrialdeetako oldarraldiek atentzio handia bereganatu dute azken urtean, eta albistearen puntan egon den Libiak edota ia-ia ahanzturara kondenatua izan den Irak hartu ditu Zurutuzak kontagai, oso modu propioan: bestelako hedabideetan agertzen ez diren protagonisten ikuspegiak papereratu ditu, "ahotsik ez dutenen" testigantzak baliatuz.
  
• Oso erreportaje landuak dira bereak. Prosa aberatsaren jabe da. Kutsu zinematografikodun deskribapenak egiten ditu. Sarreratik bertatik hasita erakargarri gertatzen diren kontakizunak egiten iaioa da, eta bere estiloari eta erritmoari esker gai da irakurlea kontakizuneko gertakariaren testuinguruan kokatu eta, hitz soilen bidez, hunkitu, sumindu edo nahigabetzeko.
  
• Arriskatu egiten da, inplikatu egiten baita kontakizunean, datuen interpretazioari bizkarra erakutsi gabe, nahiz eta behar besteko distantzia gordetzen jakin, irakurleari zor zaion begiruneagatik. 
• Iturri bilatzaile amorratua izanik, ofizialak ez diren iturriak bilatzeko ahalegin ikaragarria sumatzen da bere lanetan, ofizialak ez izan arren kontakizunaren protagonista diren "ezkutatu eta isilarazitakoen" ikuspegiak eskuratuz. 
• Euskarazko kazetaritzari, eta, ondorioz, euskarari berari prestigioa ematen die Karloz Zurutuzaren erreportajegintzak.
  

Kazetari berria

• Saritutakoa Ikusi

• Saritutakoa deskargatu

Sariduna: Miren Garate.
Saritutako lana: 2011ko azarotik 2012ko martxora bitartean Berria egunkariko "Egitura" gehigarrian ekonomiaren gainean argitaraturiko bost erreportaje, zehazki horietako bi nabarmendu direlarik: "Iluna tunela amaitutakoan" (2011ko azaroak 20) eta "Presaka, eta hankamotz" (2011ko abenduak 30).
Saria: 3.000 euro, diploma eta Xabier Laka eskultorearen oroi-ikurra.

Kazetari berria ataleko saria, kazetaritza munduan lehen urratsak egiten ari direnak gogoan hartuta ematen den saria da: 27 urte edo gutxiago dituztenek bakarrik dute lanak aurkeztu eta saria jasotzeko aukera.

Aurtengoan erreportajeak dira atal honetan saritutakoak. Saritutako lanen argitan irabazleak sariaren jabe izateko dituen merezimenduen artean, honako hauek nabarmendu nahi ditu Epaimahaiak:

• Ekonomia da erreportajeen bizkarrezurra. Gehienei lehorra gertatzen zaien gai bat samur, zehatz eta modu ulerterrazean azaltzen du.
  
• Estilo bizia eta idazkera erakargarria baliatzearen poderioz, gaia bera ere erakargarri bihurtzen du. 
• Iturri eta lekukotza ugari ageri dira, eta Euskal Herri osoaren ikuspegia gailentzen da. Asmatu du alderdi ekonomikoa eta soziala uztarri berean jartzen.
  
• Alde grafikoa ere bikain zaindu du.
  

Epaimahaiaren Sari Berezia

• Saritutakoa Ikusi

Sariduna: Beranduegi telebistako lantalde osoa.
Saritutako lana: Beranduegi telebista.
Saria: 4.000 euro eta diploma.

Berrikuntzaren irizpideari atxiki zaio Epaimahaia saria erabakitzerakoan.

Bete-betean lotzen zaio irizpide horri Beranduegi telebista, eta honako hauek dira Epaimahaiak nabarmendu nahi dituen arrazoiak:

• Aitzindari eta bide-erakusle da Beranduegi telebista, Interneterako propio pentsatu eta egindakoa, hutsik egin gabe asteroko saioa eskaintzen duena. Euskarri berrian kazetaritza-molde berritzailea egiten du. Bide berriak irekitzen ari den neurrian aitzindari da ez bakarrik euskal kazetaritzan, baita ingurukoetan ere. Inguruko telebista ohikoetan ez da gisa honetako saiorik. 
• Euskararen hedadura soziala edo, nahiago bada, euskal hiztunen komunitatearen neurria kontuan hartuz, Beranduegi telebista bada gero eta zabalagoa den hedabideen munduan gure txikitasunari arnasbidea aurkitzeko ahalegin sendoa. Txikitasunaz nola baliatu eta txikitasunean arrakasta nola lortu erakusteko guztiz baliagarri den ekimena da Beranduegi telebista. 
• Argiaren multimedia garapenerako aurrerapauso garrantzitsua da ekimen hau. Izan ere, hedabideetako albiste nagusien umorezko laburpena egiteaz gain, bai Argia aldizkarian, bai Argiaren webgunean zabaltzen dituzten edukien aukeraketa bat eskaintzen du, telebistarako propio prestatutako formatuan, eta horrela, euskarri guztiak elkarlotzen ditu. 
• Ausardiaren erakusle ere bada. Hedabide tradizionalek nozitzen duten momentu kritikoan umorea erdigunean jarriz gisa horretara bide berrien bila abiatzeko ausardia nahitaezkoa da. Ausardia eta berrikuntza, nolanahi ere, nahitaezkoak baitira aurrerabidea aurkitu eta urratzeko.
  

Ohorezko aipamena

• Ohorezko aipamena Ikusi

Saridunak: Mattin Larzabale.
Saritutako lana: Gure Irratia.

Euskal kazetaritzan aitzindari eta bide-erakusle izan direnen traiektoria eta erreferentzialtasuna aitortzea da Ohorezko aipamenaren helburua. Aurtengoan iparraldean pausatu du bere begirada epaimahaiak.

1982an, Frantzian, uhin erradiofoniakoak askatu zirenean, orduan esaten zenez, lehen aldikoz lau haizetara euskal irrati baten ahotsak zabaldu ziren Iparraldean, Gure Irratiarenak alegia. Gaur egun boz "historikoak" bilakatu direnen artean, Mattin Larzabalena daukagu.
Duela hogeita hamar urte ausarta izan behar zen ogibidea uztea, euskara hutsezko irrati baten apustua egiteko, dena sortzeko, egiteko, asmatzeko zegoelarik. Mattin, Iparraldearen gaindi ibili da, mikrofonoa eskuetan, jendearen lekukotasunak biltzen. Irratiko ahotsari, aurpegia eman zitzaion. Ezpain xokoan, aunitz esan nahi duen betiko irri:fioarekin.

Irribarretsu nola seriosa eta beroa izaten dakien Mattinen ahotsa, 30 urtez, Gure Irratiaren entzuleriaren bidelaguna izan da.

Erretiratzea tokatuko zaio Mattin Larzabali urte hondarrean, eta aitzindaria izan den kazetariaren eredugarritasuna geldituko da ondoko belaunaldientzat: jendea arretaz entzuteko gaitasuna, entzulearenganako hurbiltasuna, umorea eta ibilmolde libertario xamarra, Aiherrako lapurtar-nafarreraren dotorezia eta zehaztasuna. Hots, Mattin Larzabal egiten duen guztia. Irratilari batentzako paradoxikoa den arren, lan isila egin du Mattinek. Beti buru-belarri jardunean, baina bere gogoz bederen nabarmendu gabe, itzalean nolabait.

Mattin Larzabalentzat, beraz, Rikardo Arregi Kazetaritza Sariaren XXIV. edizioko Ohorezko aipamena.

Aitormen berezia

• Saritutakoa Ikusi

Saridunak: Sautrela

Hamabi urte pantailan, Ehunka idazle, Ehunka liburu, Ehunka Irakurle eta Milaka Literatur Aipamen.